tumne puchha to bata deti hun kyon tha yun tha

tum ne pūchhā to batā detī huuñ kyoñ thā yuuñ thā

sabab-e-tark-e-mohabbat bhī junūñ thā yuuñ thā

tum ne aañsū jinheñ samjhā thā nahīñ the aañsū

merī āñkhoñ se jo niklā thā vo ḳhuuñ thā yuuñ thā

is liye tum ne bhī shāyad mirī tauqīr na kī

mujh meñ jo shaḳhs darūñ thā vo barūñ thā yuuñ thā

yaar ab tum hī mire haq meñ gavāhī de do

varna kis kis ko batā.ūñgī maiñ yuuñ thā yuuñ thā

aur bhaḌak jaatī thī siine meñ terī yaad kī aag

sabab-e-bāda-kashī terā fusūñ thā yuuñ thā

aur kuchh vaj.h nahīñ thī mirī ḳhāmoshī kī

dil ko tanhā.ī ke aalam meñ sukūñ thā yuuñ thā

maiñ lagātār kiyā kartī thī ulfat ke savāl

us kī jānib se 'shikhā' haañ thā na huuñ thā yuuñ thā

tum ne puchha to bata deti hun kyon tha yun tha

sabab-e-tark-e-mohabbat bhi junun tha yun tha

tum ne aansu jinhen samjha tha nahin the aansu

meri aankhon se jo nikla tha wo KHun tha yun tha

is liye tum ne bhi shayad meri tauqir na ki

mujh mein jo shaKHs darun tha wo barun tha yun tha

yar ab tum hi mere haq mein gawahi de do

warna kis kis ko bataungi main yun tha yun tha

aur bhaDak jati thi sine mein teri yaad ki aag

sabab-e-baada-kashi tera fusun tha yun tha

aur kuchh wajh nahin thi meri KHamoshi ki

dil ko tanhai ke aalam mein sukun tha yun tha

main lagatar kiya karti thi ulfat ke sawal

us ki jaanib se 'shikha' han tha na hun tha yun tha