tum pasina mat kaho hai jaan-fishani ka libas

tum pasīna mat kaho hai jāñ-fishānī kā libās

dhuup meñ chalte hue rakhte haiñ paanī kā libās

parda-poshī kam se kam hotī hai har kirdār kī

pairahan lafzoñ kā bantā hai kahānī kā libās

phir ujāle se safar hogā añdhere kī taraf

jab utāreñge badan se umr-e-fānī kā libās

saath chalte haiñ chahakte bolte ilzām bhī

be-shikan hotā nahīñ yaaro javānī kā libās

inqilāb-e-vaqt kā ye bhī karishma dekhiye

hai numā.ish ke liye ab āñ-jahānī kā libās

muflisī ne kar diyā hai us kī ḳhuddārī kā ḳhuun

vo pahantā hai kisī kī mehrbānī kā libās

hukmarāñ to dafn haiñ tārīḳh ke aurāq meñ

dars-e-ibrat de rahā hai hukmrānī kā libās

jagmagātā hai ġhazal ke jism par har daur meñ

mailā hotā hī nahīñ jādū-bayānī kā libās

chand sā'at bhī ḳhushī kī apnī qismat meñ kahāñ

raas kab aayā hai mujh ko shādmānī kā libās

'ramz' vo ahd-e-ġhulāmī ho ki daur-e-hurriyat

ishtihār-e-muflisī hindustānī kā libās

tum pasina mat kaho hai jaan-fishani ka libas

dhup mein chalte hue rakhte hain pani ka libas

parda-poshi kam se kam hoti hai har kirdar ki

pairahan lafzon ka banta hai kahani ka libas

phir ujale se safar hoga andhere ki taraf

jab utarenge badan se umr-e-fani ka libas

sath chalte hain chahakte bolte ilzam bhi

be-shikan hota nahin yaro jawani ka libas

inqilab-e-waqt ka ye bhi karishma dekhiye

hai numaish ke liye ab aan-jahani ka libas

muflisi ne kar diya hai us ki KHuddari ka KHun

wo pahanta hai kisi ki mehrbani ka libas

hukmaran to dafn hain tariKH ke auraq mein

dars-e-ibrat de raha hai hukmrani ka libas

jagmagata hai ghazal ke jism par har daur mein

maila hota hi nahin jadu-bayani ka libas

chand sa'at bhi KHushi ki apni qismat mein kahan

ras kab aaya hai mujh ko shadmani ka libas

'ramz' wo ahd-e-ghulami ho ki daur-e-hurriyat

ishtihaar-e-muflisi hindustani ka libas