tum se ye kab kaha hai ki aksar mila karo

tum se ye kab kahā hai ki aksar milā karo

mujh se mire junūñ ke barābar milā karo

maiñ tum se jab milūñ to mukammal milā karūñ

tum mujh se jab milo to sarāsar milā karo

naama barā.e nisf mulāqāt bhuul jaao

takmīl-e-kār-e-ḳhair ko aa kar milā karo

miltā nahīñ vajūd ke bāhar kisī se maiñ

mujh se mire vajūd ke andar milā karo

dād-e-jamāl-o-husn sameTūñ bilā-hisāb

milne ke baa'd mujh se mukarrar milā karo

mujh se nahīñ hai ḳhaas ta'alluq tumheñ to phir

auroñ kī tarah mujh se bhī hañs kar milā karo

ye Thiik hai ki sirf taġhayyur ko hai sabāt

mil kar bichhaḌne vaalo bichhaḌ kar milā karo

tum se ye kab kaha hai ki aksar mila karo

mujh se mere junun ke barabar mila karo

main tum se jab milun to mukammal mila karun

tum mujh se jab milo to sarasar mila karo

nama barae nisf mulaqat bhul jao

takmil-e-kar-e-KHair ko aa kar mila karo

milta nahin wajud ke bahar kisi se main

mujh se mere wajud ke andar mila karo

dad-e-jamal-o-husn sameTun bila-hisab

milne ke ba'd mujh se mukarrar mila karo

mujh se nahin hai KHas ta'alluq tumhein to phir

auron ki tarah mujh se bhi hans kar mila karo

ye Thik hai ki sirf taghayyur ko hai sabaat

mil kar bichhaDne walo bichhaD kar mila karo