tum tak aa bhi na sakun tumko bula bhi na sakun

tum tak aa bhī na sakūñ tum ko bulā bhī na sakūñ

ye to kuchh aisī dharī hai ki uThā bhī na sakūñ

naqsh-e-hastī mirā dam-bhar meñ fanā hotā hai

terī hasrat to nahīñ hai ki miTā bhī na sakūñ

mīThī mīThī vo ḳhalish dī hai tire tīroñ ne

dil meñ rakh bhī na sakūñ jaan se jā bhī na sakūñ

maiñ khaTaktā hī rahā kartā huuñ aġhyāroñ ko

tum sā nāzuk huuñ jo nazroñ meñ samā bhī na sakūñ

halkī halkī vo pilā sāqi-e-mehvash mujh ko

mast rah bhī na sakūñ hosh meñ aa bhī na sakūñ

tum ko iksīr mubārak rahe daulat-mando

maiñ vo huuñ ḳhaak jo nazroñ meñ samā bhī na sakūñ

saf.ha-e-dahr se kis tarh miTe girya-e-ḳhūñ

harf-e-nam hai ki jo kāġhaz se uThā bhī na sakūñ

shikva-e-zulm bhī is darja girāñ hai 'shā'ir'

raaz kī tarh zabāñ tak jise lā bhī na sakūñ

tum tak aa bhi na sakun tum ko bula bhi na sakun

ye to kuchh aisi dhari hai ki uTha bhi na sakun

naqsh-e-hasti mera dam-bhar mein fana hota hai

teri hasrat to nahin hai ki miTa bhi na sakun

miThi miThi wo KHalish di hai tere tiron ne

dil mein rakh bhi na sakun jaan se ja bhi na sakun

main khaTakta hi raha karta hun aghyaron ko

tum sa nazuk hun jo nazron mein sama bhi na sakun

halki halki wo pila saqi-e-mehwash mujh ko

mast rah bhi na sakun hosh mein aa bhi na sakun

tum ko iksir mubarak rahe daulat-mando

main wo hun KHak jo nazron mein sama bhi na sakun

safha-e-dahr se kis tarh miTe girya-e-KHun

harf-e-nam hai ki jo kaghaz se uTha bhi na sakun

shikwa-e-zulm bhi is darja giran hai 'sha'ir'

raaz ki tarh zaban tak jise la bhi na sakun