tum to hasad ki aag mein patthar hi lae the

tum to hasad kī aag meñ patthar hī laa.e the

nauhe havā ke dosh pe ham ne sunā.e the

ye raushnī jo dekhte ho tum jagah jagah

ham ne ye sab charāġh havā meñ jalā.e the

jab qāfila hamārā huā thā lahū meñ tar

us majma-e-adū meñ nazar tum bhī aa.e the

jab shaam ke ġhubār meñ ujḌā thā koī baaġh

ujlī sahar ke phuul the ḳhushbū nahā.e the

ye tāzgī kalām ko yūñhī nahīñ milī

dil ke mu'āmalāt bhī manzar banā.e the

tum to hasad ki aag mein patthar hi lae the

nauhe hawa ke dosh pe hum ne sunae the

ye raushni jo dekhte ho tum jagah jagah

hum ne ye sab charagh hawa mein jalae the

jab qafila hamara hua tha lahu mein tar

us majma-e-adu mein nazar tum bhi aae the

jab sham ke ghubar mein ujDa tha koi bagh

ujli sahar ke phul the KHushbu nahae the

ye tazgi kalam ko yunhi nahin mili

dil ke mu'amalat bhi manzar banae the