tumhaara aks tumhaara KHayal kuchh bhi nahin

tumhārā 'aks tumhārā ḳhayāl kuchh bhī nahīñ

hamāre paas barā-e-jamāl kuchh bhī nahīñ

tumhāre haath meñ aa.eñ to shakl meñ aa.eñ

abhī talak to hamārī misāl kuchh bhī nahīñ

paḌe hue haiñ kisī chaak se haTā.e hue

hamāre haal sā ab pā.emāl kuchh bhī nahīñ

jo gir chukā ho kisī kī hasīn āñkhoñ se

phir us ke vāste ‘ahd-e-zavāl kuchh bhī nahīñ

yahīñ se jaan le apnī tū bādshāhī kā

faqīr ho ke bhī tujh se savāl kuchh bhī nahīñ

ik aur tarh kā rishta hai ab harīfoñ se

ki donoñ samt se chalne ko chaal kuchh bhī nahīñ

maiñ ek shā'ir-e-nākām huuñ ai shahzādī

sipah ke sāmne lafzoñ kī Dhaal kuchh bhī nahīñ

tumhaara 'aks tumhaara KHayal kuchh bhi nahin

hamare pas bara-e-jamal kuchh bhi nahin

tumhaare hath mein aaen to shakl mein aaen

abhi talak to hamari misal kuchh bhi nahin

paDe hue hain kisi chaak se haTae hue

hamare haal sa ab paemal kuchh bhi nahin

jo gir chuka ho kisi ki hasin aankhon se

phir us ke waste ‘ahd-e-zawal kuchh bhi nahin

yahin se jaan le apni tu baadshahi ka

faqir ho ke bhi tujh se sawal kuchh bhi nahin

ek aur tarh ka rishta hai ab harifon se

ki donon samt se chalne ko chaal kuchh bhi nahin

main ek sha'ir-e-nakaam hun ai shahzadi

sipah ke samne lafzon ki Dhaal kuchh bhi nahin