tumhaara dil jo chura le wo scene thoDi hai

tumhārā dil jo churā le vo scene thoḌī hai

ġhazal hamārī ye tāza-tarīn thoḌī hai

uThā.eñ kaise tire naaz ye bhī batlā de

hamāre dil meñ faqat tū makīn thoḌī hai

kahāñ talak na lage us ko bad-nazar sab kī

hamāre jaisā vo pardā-nashīn thoḌī hai

vo ham ko jaan se zaa.id 'azīz hai lekin

hamārī baat kā us ko yaqīn thoḌī hai

samajh sake jo burā.ī bhalā.ī ko jag kī

nazar kisī kī bhī itnī mahīn thoḌī hai

use bhī paḌtī hai ārām kī yahāñ hājat

huzūr maañ hai vo koī machine thoḌī hai

mile jo daad hameñ aap se kabhī 'mīnā'

hamārī shā'irī itnī zahīn thoḌī hai

tumhaara dil jo chura le wo scene thoDi hai

ghazal hamari ye taza-tarin thoDi hai

uThaen kaise tere naz ye bhi batla de

hamare dil mein faqat tu makin thoDi hai

kahan talak na lage us ko bad-nazar sab ki

hamare jaisa wo parda-nashin thoDi hai

wo hum ko jaan se zaid 'aziz hai lekin

hamari baat ka us ko yaqin thoDi hai

samajh sake jo burai bhalai ko jag ki

nazar kisi ki bhi itni mahin thoDi hai

use bhi paDti hai aaram ki yahan hajat

huzur man hai wo koi machine thoDi hai

mile jo dad hamein aap se kabhi 'mina'

hamari sha'iri itni zahin thoDi hai