tumhaara gham hi to jine ka ek bahana hai

tumhārā ġham hī to jiine kā ik bahāna hai

isī charāġh se raushan ġharīb-ḳhāna hai

mire qadam to kināroñ se bair rakhte haiñ

mirā to 'azm samundar ke paar jaanā hai

tire ḳhayāl ke zaanū pe rakh rahā huuñ sar

thakan se chuur badan ko sukūn paanā hai

yahī savāl havāoñ se pūchhtā huuñ maiñ

safar kahāñ kā hai kis kā diyā bujhānā hai

hai aur baat ki uThtā nahīñ dhuāñ varna

diloñ kā aag se rishta bahut purānā hai

ye maslahat hai miyāñ sab ko sab nahīñ miltā

kahīñ sanad hai kahīñ 'ilm kā ḳhazāna hai

mire shu'ūr ne shā'ir banā diyā mujh ko

'farāz' varna kise ḳhūn-e-dil jalānā hai

tumhaara gham hi to jine ka ek bahana hai

isi charagh se raushan gharib-KHana hai

mere qadam to kinaron se bair rakhte hain

mera to 'azm samundar ke par jaana hai

tere KHayal ke zanu pe rakh raha hun sar

thakan se chur badan ko sukun pana hai

yahi sawal hawaon se puchhta hun main

safar kahan ka hai kis ka diya bujhana hai

hai aur baat ki uThta nahin dhuan warna

dilon ka aag se rishta bahut purana hai

ye maslahat hai miyan sab ko sab nahin milta

kahin sanad hai kahin 'ilm ka KHazana hai

mere shu'ur ne sha'ir bana diya mujh ko

'faraaz' warna kise KHun-e-dil jalana hai