tumhaara gham na ho to zindagi achchhi nahin lagti

tumhārā ġham na ho to zindagī achchhī nahīñ lagtī

ḳhamoshī se bahe jo vo nadī achchhī nahīñ lagtī

paḌe ho ishq meñ to ishq kī tahzīb bhī sīkho

kisī āshiq ke chehre par hañsī achchhī nahīñ lagtī

ye man kartā hai bādal aa ke Dhak leñ chāñd ko puurā

hoñ jab vo paas to phir chāñdnī achchhī nahīñ lagtī

kahā us ne hameñ kab vasl se inkār hai lekin

ḳhalish siine meñ us ke ba.ad kī achchhī nahīñ lagtī

ajab hai baat hairat kī hamārī shakl ye un ko

kabhī lagtī hai achchhī aur kabhī achchhī nahīñ lagtī

likhī haiñ saarī ġhazleñ bas usī ke vāste maiñ ne

vahī haañ vo hī jis ko shā.irī achchhī nahīñ lagtī

tumhaara gham na ho to zindagi achchhi nahin lagti

KHamoshi se bahe jo wo nadi achchhi nahin lagti

paDe ho ishq mein to ishq ki tahzib bhi sikho

kisi aashiq ke chehre par hansi achchhi nahin lagti

ye man karta hai baadal aa ke Dhak len chand ko pura

hon jab wo pas to phir chandni achchhi nahin lagti

kaha us ne hamein kab wasl se inkar hai lekin

KHalish sine mein us ke baad ki achchhi nahin lagti

ajab hai baat hairat ki hamari shakl ye un ko

kabhi lagti hai achchhi aur kabhi achchhi nahin lagti

likhi hain sari ghazlen bas usi ke waste main ne

wahi han wo hi jis ko shairi achchhi nahin lagti