tumhaara to yahan har pasban hai

tumhārā to yahāñ har pāsbāñ hai

hamāre har qadam par imtihāñ hai

liyā hisse meñ jis ne bhī makāñ hai

zarā pūchho to us se maañ kahāñ hai

sitam bhaa.ī pe bhaa.ī Dhā rahā hai

har ik ghar kī yahī ab dāstāñ hai

mileñge dil hamāre kis tarah se

uThī dīvār-e-nafrat darmiyāñ hai

zarūrat lab-kushā.ī kī nahīñ hai

tafakkur tere māthe se 'ayāñ hai

mohabbat se hī ye duniyā hai qaa.em

mohabbat kā hī ye dushman jahāñ hai

mohabbat būḌhī kyoñ hotī nahīñ hai

hamesha hī ye rahtī kyoñ javāñ hai

ise sīñcheñge ham apne lahū se

hamārā hī ye 'ātif' gulsitāñ hai

tumhaara to yahan har pasban hai

hamare har qadam par imtihan hai

liya hisse mein jis ne bhi makan hai

zara puchho to us se man kahan hai

sitam bhai pe bhai Dha raha hai

har ek ghar ki yahi ab dastan hai

milenge dil hamare kis tarah se

uThi diwar-e-nafrat darmiyan hai

zarurat lab-kushai ki nahin hai

tafakkur tere mathe se 'ayan hai

mohabbat se hi ye duniya hai qaem

mohabbat ka hi ye dushman jahan hai

mohabbat buDhi kyon hoti nahin hai

hamesha hi ye rahti kyon jawan hai

ise sinchenge hum apne lahu se

hamara hi ye 'atif' gulsitan hai