tumhaara zauq-e-parastish mujhe aziz magar

tumhārā zauq-e-parastish mujhe aziiz magar

maiñ is zamīn kī miTTī mujhe ḳhudā na kaho

tumhāre saath agar do-qadam bhī chal na sakūñ

to ḳhasta-pā huuñ mujhe mujrim-e-vafā na kaho

ye ek pal kī dhaḌaktī hayāt bhī hai bahut

tamām-umr ke is rog ko burā na kaho

is ek ḳhauf se lab sī liye tumhāre huzūr

ki harf-e-shauq ko iz.hār-e-mudda.ā na kaho

ye be-ruḳhī kā gilā mujh se pahle ḳhud se karo

use nigāh kā yak-tarfa faisla na kaho

guzarte vaqt ke marham se bhar na jaa.e kahīñ

is ek zaḳhm ko chāhat kī intihā na kaho

maiñ ek zinda haqīqat huuñ ek pal hī sahī

tumhārā aks huuñ tum to mujhe fanā na kaho

tumhaara zauq-e-parastish mujhe aziz magar

main is zamin ki miTTi mujhe KHuda na kaho

tumhaare sath agar do-qadam bhi chal na sakun

to KHasta-pa hun mujhe mujrim-e-wafa na kaho

ye ek pal ki dhaDakti hayat bhi hai bahut

tamam-umr ke is rog ko bura na kaho

is ek KHauf se lab si liye tumhaare huzur

ki harf-e-shauq ko izhaar-e-muddaa na kaho

ye be-ruKHi ka gila mujh se pahle KHud se karo

use nigah ka yak-tarfa faisla na kaho

guzarte waqt ke marham se bhar na jae kahin

is ek zaKHm ko chahat ki intiha na kaho

main ek zinda haqiqat hun ek pal hi sahi

tumhaara aks hun tum to mujhe fana na kaho