tumhaare aane ki jab se KHabar nahin aai

tumhāre aane kī jab se ḳhabar nahīñ aa.ī

tabhī se niiñd kī devī nazar nahīñ aa.ī

ġhamoñ ke saa.e meñ aayā nahīñ ḳhayāl tirā

ki muddatoñ se ḳhushī mere ghar nahīñ aa.ī

lagānā ġhairoñ pe ilzām sab ko aatā hai

kisī ko apnī kamī ḳhud nazar nahīñ aa.ī

tumhāre baa'd to mausam bhī jaise ruuTh gayā

bahut dinoñ se nasīm-e-sahar nahīñ aa.ī

zamīñ pe ḳhuun kī bārish meñ bah gayā sāvan

ghaTā to aa.ī magar jhuum kar nahīñ aa.ī

tumhāre saath kabhī ho ga.ī thī ruḳhsat jo

ḳhushī vo lauT ke phir 'umr bhar nahīñ aa.ī

maiñ intizār meñ jis ke khaḌā rahā aksar

kabhī vo shoḳh-adā baam par nahīñ aa.ī

har ik maqām se ye soch kar guzartā huuñ

talāsh jis kī hai vo rah-guzar nahīñ aa.ī

'kashish' ke sar pe thā jab vāldain kā saaya

kabhī bhī un kī du'ā be-asar nahīñ aa.ī

tumhaare aane ki jab se KHabar nahin aai

tabhi se nind ki dewi nazar nahin aai

ghamon ke sae mein aaya nahin KHayal tera

ki muddaton se KHushi mere ghar nahin aai

lagana ghairon pe ilzam sab ko aata hai

kisi ko apni kami KHud nazar nahin aai

tumhaare ba'd to mausam bhi jaise ruTh gaya

bahut dinon se nasim-e-sahar nahin aai

zamin pe KHun ki barish mein bah gaya sawan

ghaTa to aai magar jhum kar nahin aai

tumhaare sath kabhi ho gai thi ruKHsat jo

KHushi wo lauT ke phir 'umr bhar nahin aai

main intizar mein jis ke khaDa raha aksar

kabhi wo shoKH-ada baam par nahin aai

har ek maqam se ye soch kar guzarta hun

talash jis ki hai wo rah-guzar nahin aai

'kashish' ke sar pe tha jab waldain ka saya

kabhi bhi un ki du'a be-asar nahin aai