tumhaare aane se kuchh na puchho hamein nai zindagi milegi

tumhāre aane se kuchh na pūchho hameñ na.ī zindagī milegī

qarār dil ko jigar ko rāhat nigāh ko raushnī milegī

bahār-e-tāza jo aa ga.ī hai to zaḳhm ko tāzgī milegī

jigar ko bhī dāġh-e-ġham mileñge nazar ko bhī kuchh namī milegī

haiñ sāz-e-hastī ka.ī tarah ke magar hai maqsūd ek sab kā

alag alag naġhme hoñ to kyā hai sadā to bas ek sī milegī

vafā kī nagrī meñ koī jākar vafā-shi.āroñ kā haal dekhe

dhuāñ dhuāñ se mileñge chehre luTī luTī zindagī milegī

yahī hai dastūr-e-ishq-o-ulfat yahī hai anjām āshiqī kā

hamārī āñkhoñ meñ ashk hoñge laboñ pe un ke hañsī milegī

agar pareshān haal huuñ maiñ to tum ko kyoñ iztirāb hai yuuñ

tumhīñ ne dī badduā ye mujh ko kabhī na tum ko ḳhushī milegī

qadam qadam par lagegī Thokar agar ḳhirad se na kaam loge

agar chaloge sañbhal ke 'nāzī' to raah firdaus kī milegī

tumhaare aane se kuchh na puchho hamein nai zindagi milegi

qarar dil ko jigar ko rahat nigah ko raushni milegi

bahaar-e-taza jo aa gai hai to zaKHm ko tazgi milegi

jigar ko bhi dagh-e-gham milenge nazar ko bhi kuchh nami milegi

hain saz-e-hasti kai tarah ke magar hai maqsud ek sab ka

alag alag naghme hon to kya hai sada to bas ek si milegi

wafa ki nagri mein koi jakar wafa-shiaron ka haal dekhe

dhuan dhuan se milenge chehre luTi luTi zindagi milegi

yahi hai dastur-e-ishq-o-ulfat yahi hai anjam aashiqi ka

hamari aankhon mein ashk honge labon pe un ke hansi milegi

agar pareshan haal hun main to tum ko kyon iztirab hai yun

tumhin ne di baddua ye mujh ko kabhi na tum ko KHushi milegi

qadam qadam par lagegi Thokar agar KHirad se na kaam loge

agar chaloge sanbhal ke 'nazi' to rah firdaus ki milegi