tumhaare did ki hasrat bahut mushkil se niklegi

tumhāre diid kī hasrat bahut mushkil se niklegī

duā ban kar shab-e-ġham vo hamāre dil se niklegī

ḳhabar kyā thī ki terī kaj-adā.ī se but-e-rā.anā

bisān-e-sham.a ro kar aarzū mahfil se niklegī

tamannā rafta rafta rañg kuchh dikhlā.egī apnā

banegī nūr-e-jāñ aur dīda-e-kāmil se niklegī

bisān-e-nik.hat-e-gul chhup nahīñ saktī chhupāne se

ye bū-e-ḳhūn-e-āshiq dāman-e-qātil se niklegī

nihāñ kyā ḳhaak hogī hasrat-e-dīdār āshiq kī

vo ik din yaas ban kar dīda-e-bismil se niklegī

dikhā.egī mohabbat ek din un ko asar apnā

samā.ī dil meñ jo un ke vo mere dil se niklegī

tasavvur jānib-e-dil chāhiye majnūñ tujhe karnā

tū jis lailā kā āshiq hai vo is mahmil se niklegī

Thahar jā naqa-e-dilbar ki maiñ chūmūñ qadam tere

sadā ye musht-e-ḳhāk-e-āshiq-e-be-dil se niklegī

zabāñ se nāla-o-fariyād karnā hai abas terā

'jamīla' vo duā kaam aa.egī jo dil se niklegī

tumhaare did ki hasrat bahut mushkil se niklegi

dua ban kar shab-e-gham wo hamare dil se niklegi

KHabar kya thi ki teri kaj-adai se but-e-raana

bisan-e-shama ro kar aarzu mahfil se niklegi

tamanna rafta rafta rang kuchh dikhlaegi apna

banegi nur-e-jaan aur dida-e-kaamil se niklegi

bisan-e-nikhat-e-gul chhup nahin sakti chhupane se

ye bu-e-KHun-e-ashiq daman-e-qatil se niklegi

nihan kya KHak hogi hasrat-e-didar aashiq ki

wo ek din yas ban kar dida-e-bismil se niklegi

dikhaegi mohabbat ek din un ko asar apna

samai dil mein jo un ke wo mere dil se niklegi

tasawwur jaanib-e-dil chahiye majnun tujhe karna

tu jis laila ka aashiq hai wo is mahmil se niklegi

Thahar ja naqa-e-dilbar ki main chumun qadam tere

sada ye musht-e-KHak-e-ashiq-e-be-dil se niklegi

zaban se nala-o-fariyaad karna hai abas tera

'jamila' wo dua kaam aaegi jo dil se niklegi