tumhaare gham ko gham-e-jaan bana liya maine

tumhāre ġham ko ġham-e-jāñ banā liyā maiñ ne

ki jañgaloñ ko guloñ se sajā diyā maiñ ne

na jaane kitnī umīdeñ lahū lahū kar ke

dil-e-tabāh ko jiinā sikhā diyā maiñ ne

sabab ho kuchh bhī unheñ rūThne kī aadat hai

ye sochnā hī ġhalat hai ki kyā kiyā maiñ ne

har ek baat mire haq meñ thī magar phir bhī

jo faisla thā bahut soch kar kiyā maiñ ne

use na bhuul sakā huuñ na bhuul pā.ūñgā

ye tajraba to ka.ī baar kar liyā maiñ ne

tire baġhair mirī pyaas bujh nahīñ paa.ī

hamesha yaad kiyā tujh ko sāqiyā maiñ ne

mirī bhī ḳhāmushī dekhī nahīñ ga.ī un se

kisī kā zabt-e-suḳhan aazmā liyā maiñ ne

ilaaj soz-e-darūñ kā na ho sakā phir bhī

'sahar' ba-nām-e-davā zahr bhī piyā maiñ ne

tumhaare gham ko gham-e-jaan bana liya main ne

ki jangalon ko gulon se saja diya main ne

na jaane kitni umiden lahu lahu kar ke

dil-e-tabah ko jina sikha diya main ne

sabab ho kuchh bhi unhen ruThne ki aadat hai

ye sochna hi ghalat hai ki kya kiya main ne

har ek baat mere haq mein thi magar phir bhi

jo faisla tha bahut soch kar kiya main ne

use na bhul saka hun na bhul paunga

ye tajraba to kai bar kar liya main ne

tere baghair meri pyas bujh nahin pai

hamesha yaad kiya tujh ko saqiya main ne

meri bhi KHamushi dekhi nahin gai un se

kisi ka zabt-e-suKHan aazma liya main ne

ilaj soz-e-darun ka na ho saka phir bhi

'sahar' ba-nam-e-dawa zahr bhi piya main ne