tumhaare honT jin ke zikr ki garmi se jalte hain

tumhāre hoñT jin ke zikr kī garmī se jalte haiñ

hamāre jaise dīvāne unhīñ rāhoñ pe chalte haiñ

jinheñ qirtās par lā.ūñ to ik hañgāma ho jaa.e

shab-e-tanhā.ī meñ aksar kuchh aise sher Dhalte haiñ

batāo chain se kaise raheñ ham aisī vaadī meñ

jahāñ gulshan ke rakhvāle hī kaliyoñ ko masalte haiñ

tire aage na apnā sar jhukā.eñ to kahāñ jaa.eñ

ki ham roz-e-azal se hī tire TukḌoñ pe palte haiñ

machal jaatā hai dil vaise hī tum ko dekhne ke baad

khilaunā dekh kar jis tarah se bachche machalte haiñ

pahuñchtī hai maqām-e-intihā par bandagī jis dam

hamāre paañv kī Thokar se bhī chashme ubalte haiñ

tumhārī rahbarī qaa.em rahegī phir bhī ai 'rahbar'

nikal jaane do kuchh logoñ ko gar aage nikalte haiñ

tumhaare honT jin ke zikr ki garmi se jalte hain

hamare jaise diwane unhin rahon pe chalte hain

jinhen qirtas par laun to ek hangama ho jae

shab-e-tanhai mein aksar kuchh aise sher Dhalte hain

batao chain se kaise rahen hum aisi wadi mein

jahan gulshan ke rakhwale hi kaliyon ko masalte hain

tere aage na apna sar jhukaen to kahan jaen

ki hum roz-e-azal se hi tere TukDon pe palte hain

machal jata hai dil waise hi tum ko dekhne ke baad

khilauna dekh kar jis tarah se bachche machalte hain

pahunchti hai maqam-e-intiha par bandagi jis dam

hamare panw ki Thokar se bhi chashme ubalte hain

tumhaari rahbari qaem rahegi phir bhi ai 'rahbar'

nikal jaane do kuchh logon ko gar aage nikalte hain