tumhaare hukm ki tamil be-KHauf-o-KHatar hogi

tumhāre hukm kī tā'mīl be-ḳhauf-o-ḳhatar hogī

na dāman merā nam hogā na merī aañkh tar hogī

ham ab tak shahr-e-ġham meñ ajnabī haiñ kyā kaheñ tum se

kahāñ par raat guzregī kahāñ par dopahar hogī

ghire haiñ shaam hī se aaj bādal un kī yādoñ ke

mujhe to aisā lagtā hai ye bārish raat bhar hogī

palaT jaa.eñ yahīñ se jin ko apnī jaan pyārī ho

hamārī aaj kī shab kū-e-qātil meñ basar hogī

hayāt-e-sham' ke do ruḳh haiñ aur donoñ hī afsurda

jalegī ye to shab hogī bujhegī to sahar hogī

tumhārī bazm se uTh kar bahut māyūs aa.e ham

ga.e the is tavaqqo' par ki taskīn-e-nazar hogī

mohabbat ke safar meñ ḳhvāhish-e-takmīl kyā mā'nī

yahāñ takmīl kī ḳhvāhish bhī tauhīn-e-safar hogī

misāloñ ke liye jis se chuneñge log tahrīreñ

vo merī zindagānī kī kitāb-e-mo'tabar hogī

ḳhabar kyā thī 'razī' ulfat meñ aisā vaqt aa.egā

ki din guzregā hañs kar raat ro ro ke basar hogī

tumhaare hukm ki ta'mil be-KHauf-o-KHatar hogi

na daman mera nam hoga na meri aankh tar hogi

hum ab tak shahr-e-gham mein ajnabi hain kya kahen tum se

kahan par raat guzregi kahan par dopahar hogi

ghire hain sham hi se aaj baadal un ki yaadon ke

mujhe to aisa lagta hai ye barish raat bhar hogi

palaT jaen yahin se jin ko apni jaan pyari ho

hamari aaj ki shab ku-e-qatil mein basar hogi

hayat-e-sham' ke do ruKH hain aur donon hi afsurda

jalegi ye to shab hogi bujhegi to sahar hogi

tumhaari bazm se uTh kar bahut mayus aae hum

gae the is tawaqqo' par ki taskin-e-nazar hogi

mohabbat ke safar mein KHwahish-e-takmil kya ma'ni

yahan takmil ki KHwahish bhi tauhin-e-safar hogi

misalon ke liye jis se chunenge log tahriren

wo meri zindagani ki kitab-e-mo'tabar hogi

KHabar kya thi 'razi' ulfat mein aisa waqt aaega

ki din guzrega hans kar raat ro ro ke basar hogi