tumhaare husn ke jalwe baham nahin hain miyan

tumhāre husn ke jalve baham nahīñ haiñ miyāñ

nahīñ haiñ ab vo tumhāre karam nahīñ haiñ miyāñ

rah-e-adam ke muqābil nahīñ majāl-e-vajūd

sitam to ye hai ki ham haiñ adam nahīñ haiñ miyāñ

ye mānte haiñ ki qatra haiñ ek paanī kā

magar vajūd ke dariyā meñ zam nahīñ haiñ miyāñ

chale bhī jā.eñge kaahe kī jaldiyāñ haiñ tumheñ

abhī ruko abhī ham tāza-dam nahīñ haiñ miyāñ

hameñ na Dhaao ki mushkil se ham khaḌe hue haiñ

sitam-gazīda to haiñ ḳhud sitam nahīñ haiñ miyāñ

hazār baar isī zindagī se guzre haiñ

tumhāre ḳhizr se kam-umr ham nahīñ haiñ miyāñ

yahāñ koī kabhī vāpas palaT nahīñ saktā

yahāñ kisī ke bhī ulTe qadam nahīñ haiñ miyāñ

harīm-e-dil meñ koī lā-sharīk hai ki nahīñ

magar ye tai hai vo pahle sanam nahīñ haiñ miyāñ

ab is jahāñ meñ hamārā agar nahīñ hai ḳhudā

ḳhudā ke ham bhī ḳhudā kī qasam nahīñ hai miyāñ

ye māl-o-daulat-e-duniyā ye rishta-o-paivand

ye rozgār ke ġham haiñ ye ġham nahīñ haiñ miyāñ

tumhaare husn ke jalwe baham nahin hain miyan

nahin hain ab wo tumhaare karam nahin hain miyan

rah-e-adam ke muqabil nahin majal-e-wajud

sitam to ye hai ki hum hain adam nahin hain miyan

ye mante hain ki qatra hain ek pani ka

magar wajud ke dariya mein zam nahin hain miyan

chale bhi jaenge kahe ki jaldiyan hain tumhein

abhi ruko abhi hum taza-dam nahin hain miyan

hamein na Dhao ki mushkil se hum khaDe hue hain

sitam-gazida to hain KHud sitam nahin hain miyan

hazar bar isi zindagi se guzre hain

tumhaare KHizr se kam-umr hum nahin hain miyan

yahan koi kabhi wapas palaT nahin sakta

yahan kisi ke bhi ulTe qadam nahin hain miyan

harim-e-dil mein koi la-sharik hai ki nahin

magar ye tai hai wo pahle sanam nahin hain miyan

ab is jahan mein hamara agar nahin hai KHuda

KHuda ke hum bhi KHuda ki qasam nahin hai miyan

ye mal-o-daulat-e-duniya ye rishta-o-paiwand

ye rozgar ke gham hain ye gham nahin hain miyan