tumhaare KHwab ki tabir hona chahta hun

tumhāre ḳhvāb kī ta.abīr honā chāhtā huuñ

mujhe dekho ki maiñ tasḳhīr honā chāhtā huuñ

jahāñ-gardī mujhe chaukhaT se bāhar khīñchtī hai

maiñ apne paaoñ kī zanjīr honā chāhtā huuñ

mujhe jhūTī hañsī ne khokhlā sā kar diyā hai

bahut afsurda-o-dil-gīr honā chāhtā huuñ

bahut hī munjamid sā zindagī ne kar diyā hai

maiñ ab chaltī huī shamshīr honā chāhtā huuñ

uThā.e phir rahā huuñ kab se apne ḳhāl-o-ḳhad ko

tirī dīvār pe tasvīr honā chāhtā huuñ

kisī agle zamāne par khuleñge mere ma.anī

havā kī lauh par tahrīr honā chāhtā huuñ

mujhe 'shahzād' mere kīmiyā-dāñ se milā do

maiñ miTTī huuñ magar iksīr honā chāhtā huuñ

tumhaare KHwab ki tabir hona chahta hun

mujhe dekho ki main tasKHir hona chahta hun

jahan-gardi mujhe chaukhaT se bahar khinchti hai

main apne paon ki zanjir hona chahta hun

mujhe jhuTi hansi ne khokhla sa kar diya hai

bahut afsurda-o-dil-gir hona chahta hun

bahut hi munjamid sa zindagi ne kar diya hai

main ab chalti hui shamshir hona chahta hun

uThae phir raha hun kab se apne KHal-o-KHad ko

teri diwar pe taswir hona chahta hun

kisi agle zamane par khulenge mere mani

hawa ki lauh par tahrir hona chahta hun

mujhe 'shahzad' mere kimiya-dan se mila do

main miTTi hun magar iksir hona chahta hun