tumhaare KHwab se hum der tak bahalte hain

tumhāre ḳhvāb se ham der tak bahalte haiñ

phir apne dast-e-haqīqat se aañkh malte haiñ

hudūd-e-dasht-e-yaqīñ ham ko de rahī hai sadā

fasīl-e-shahr-e-gumāñ se ham ab nikalte haiñ

sunā hai 'ishq kā mai-ḳhāna hai vo mai-ḳhāna

jahāñ pe girte haiñ vo bhī jo kuchh sañbhalte haiñ

purānī mai na.e kāsoñ meñ Daalī jaatī hai

ḳhayāl-o-fikr kahāñ zāviye badalte haiñ

patā milā ki suḳhan-shahr meñ dakan kūcha

valī-o-tāj ke naqsh-e-qadam pe chalte haiñ

ai taaj dekh rahā huuñ tirī nigār-e-hayāt

tamām rang na.e haiñ jo is meñ Dhalte haiñ

tumhāre zikr se raushan hai bazm-e-tanhā.ī

tumhārī yaad ke dil meñ charāġh jalte haiñ

milī hai ham ko virāsat meñ shā'irī 'asrār'

ḳhayāl-o-fikr hamāre usī pe palte haiñ

tumhaare KHwab se hum der tak bahalte hain

phir apne dast-e-haqiqat se aankh malte hain

hudud-e-dasht-e-yaqin hum ko de rahi hai sada

fasil-e-shahr-e-guman se hum ab nikalte hain

suna hai 'ishq ka mai-KHana hai wo mai-KHana

jahan pe girte hain wo bhi jo kuchh sanbhalte hain

purani mai nae kason mein Dali jati hai

KHayal-o-fikr kahan zawiye badalte hain

pata mila ki suKHan-shahr mein dakan kucha

wali-o-taj ke naqsh-e-qadam pe chalte hain

ai taj dekh raha hun teri nigar-e-hayat

tamam rang nae hain jo is mein Dhalte hain

tumhaare zikr se raushan hai bazm-e-tanhai

tumhaari yaad ke dil mein charagh jalte hain

mili hai hum ko wirasat mein sha'iri 'asrar'

KHayal-o-fikr hamare usi pe palte hain