tumhaare milne ka kya e’tibar rah mein hai

tumhāre milne kā kyā e’tibār raah meñ hai

nazar kī āḳhirī had tak ġhubār raah meñ hai

chaman se duur nigār-e-bahār raah meñ hai

na jaane kis ke liye be-qarār raah meñ hai

khaḌī hai sub.h pashemāñ kisī ke āñgan meñ

koī to us ke liye sogvār raah meñ hai

ḳhudā hī jaane ki hai us ko justujū kis kī

vo āñsuoñ kī tarah be-qarār raah meñ hai

ye kaun ḳhaak uḌātā fareb se guzrā

nazar kī āḳhirī had tak ġhubār raah meñ hai

qadam qadam pe luTāne ko māya-e-hastī

lahūluhān koī shahsavār raah meñ hai

vo ham-safar to hai lekin hai ajnabī jaisā

'ajīb tarah kā ik intishār raah meñ hai

tum apne chāhne vāloñ kī bhiiḌ meñ dekho

hamārī tarah koī jāñ-nisār raah meñ hai

na dekh ham ko hiqārat se dekhne vaale

hamīñ sā koī yahāñ ġham-gusār raah meñ hai

nafas nafas meñ liye sho'la phir rahī hai havā

lage hai aisā koī sho.ala-bār raah meñ hai

ye buuñd buuñd sā ristā hai kyoñ lahū merā

na koī shahr na koī dayār raah meñ hai

ḳhudā kā lutf-o-karam bhī rahegā ham pe 'nazar'

agarche jaan kā dushman hazār raah meñ hai

tumhaare milne ka kya e’tibar rah mein hai

nazar ki aaKHiri had tak ghubar rah mein hai

chaman se dur nigar-e-bahaar rah mein hai

na jaane kis ke liye be-qarar rah mein hai

khaDi hai subh pasheman kisi ke aangan mein

koi to us ke liye sogwar rah mein hai

KHuda hi jaane ki hai us ko justuju kis ki

wo aansuon ki tarah be-qarar rah mein hai

ye kaun KHak uData fareb se guzra

nazar ki aaKHiri had tak ghubar rah mein hai

qadam qadam pe luTane ko maya-e-hasti

lahuluhan koi shahsawar rah mein hai

wo ham-safar to hai lekin hai ajnabi jaisa

'ajib tarah ka ek intishaar rah mein hai

tum apne chahne walon ki bhiD mein dekho

hamari tarah koi jaan-nisar rah mein hai

na dekh hum ko hiqarat se dekhne wale

hamin sa koi yahan gham-gusar rah mein hai

nafas nafas mein liye sho'la phir rahi hai hawa

lage hai aisa koi shoala-bar rah mein hai

ye bund bund sa rista hai kyon lahu mera

na koi shahr na koi dayar rah mein hai

KHuda ka lutf-o-karam bhi rahega hum pe 'nazar'

agarche jaan ka dushman hazar rah mein hai