tumhaare nam kar baiThe dil-o-jaan ki KHushi sahab

tumhāre naam kar baiThe dil-o-jāñ kī ḳhushī sāhab

hasīn-o-dil-nasīñ lagtī hai ab to zindagī sāhab

milan kī sā.atoñ meñ jāñ-fizā ḳhushbū anokhī hai

hama-dam raqs kartī hai ajab ik be-ḳhudī sāhab

tar-o-tāza huī miTTī mirī bas ek lamhe meñ

hunar ab āzmāo aur karo kūza-garī sāhab

tumhāre ek harf-e-ḳhush-numā par vaar duuñ ġhazleñ

suḳhan kī jaan ho tum aur qalam kī raushnī sāhab

sitāre giit gaate haiñ samundar raqs kartā hai

mukammal ho ga.e ham tum nahīñ koī kamī sāhab

yahī sach hai ki ham tum muḳhtalif haiñ aur logoñ se

zamāne meñ misālī hai hamārī ham-rahī sāhab

ki jab bhī haath mere bārgāh-e-rab meñ uThte haiñ

tashakkur lab pe hotā hai nigāhoñ meñ namī sāhab

tumhaare nam kar baiThe dil-o-jaan ki KHushi sahab

hasin-o-dil-nasin lagti hai ab to zindagi sahab

milan ki saaton mein jaan-fiza KHushbu anokhi hai

hama-dam raqs karti hai ajab ek be-KHudi sahab

tar-o-taza hui miTTi meri bas ek lamhe mein

hunar ab aazmao aur karo kuza-gari sahab

tumhaare ek harf-e-KHush-numa par war dun ghazlen

suKHan ki jaan ho tum aur qalam ki raushni sahab

sitare git gate hain samundar raqs karta hai

mukammal ho gae hum tum nahin koi kami sahab

yahi sach hai ki hum tum muKHtalif hain aur logon se

zamane mein misali hai hamari ham-rahi sahab

ki jab bhi hath mere bargah-e-rab mein uThte hain

tashakkur lab pe hota hai nigahon mein nami sahab