tumhaare paikar se phuTne wali raushni meri rah mein hai

tumhāre paikar se phūTne vaalī raushnī merī raah meñ hai

ye fāsla is liye gavārā ki ik haqīqat nigāh meñ hai

fasīl-e-ġham gir ga.ī to kis se lipaT ke ro.eñge shahr-e-yārāñ

ye soch kar jhuum uThā huuñ yaaro ki ġham ḳhud apnī panāh meñ hai

maiñ zindagī taj ke aa rahā huuñ isī liye muskurā rahā huuñ

zarā batāo ki kis liye ab kajī tumhārī kulāh meñ hai

tumhāre bāġhoñ se duur vīrān regzāroñ meñ gul khile haiñ

shafaq ufuq ke hisār meñ hai shaguftagī shāhrāh meñ hai

nadī nadī be-karāñ ḳhamoshī shajar shajar sogvār saa.e

ye raat bīmār ho ga.ī hai ki mubtalā phir gunāh meñ hai

udaas yādoñ ne bāb-e-afkār par ka.ī baar dastakeñ diiñ

magar qalam hai ki gul-fishāñ bint-e-shab kī ārām-gāh meñ hai

koī qalandar hai koī darvesh koī vahshī hai koī 'rāhī'

har ek shorīda-sar barā.e-sahar tirī ḳhānqāh meñ hai

tumhaare paikar se phuTne wali raushni meri rah mein hai

ye fasla is liye gawara ki ek haqiqat nigah mein hai

fasil-e-gham gir gai to kis se lipaT ke roenge shahr-e-yaran

ye soch kar jhum uTha hun yaro ki gham KHud apni panah mein hai

main zindagi taj ke aa raha hun isi liye muskura raha hun

zara batao ki kis liye ab kaji tumhaari kulah mein hai

tumhaare baghon se dur viran regzaron mein gul khile hain

shafaq ufuq ke hisar mein hai shaguftagi shahrah mein hai

nadi nadi be-karan KHamoshi shajar shajar sogwar sae

ye raat bimar ho gai hai ki mubtala phir gunah mein hai

udas yaadon ne bab-e-afkar par kai bar dastaken din

magar qalam hai ki gul-fishan bint-e-shab ki aaram-gah mein hai

koi qalandar hai koi darwesh koi wahshi hai koi 'rahi'

har ek shorida-sar barae-sahar teri KHanqah mein hai