tumhaare zulm ko bhi hum wafa samajhte hain

tumhāre zulm ko bhī ham vafā samajhte haiñ

adā-o-nāz ko apnī qazā samajhte haiñ

junūn-e-ishq meñ ham kyā se kyā samajhte haiñ

tumhārī shaan ko shān-e-ḳhudā samajhte haiñ

huzūr aap haiñ husn-o-jamāl ke bande

use na pūchhiye ham aur kyā samajhte haiñ

parī se huur se shams-o-qamar se behtar haiñ

ham un ke husn ko shān-e-ḳhudā samajhte haiñ

sitam-shi.ār samajhne lage haiñ ham tujh ko

vo aur haiñ jo tujhe bā-vafā samajhte haiñ

ye rāz-e-ishq chhupāne se chhup nahīñ saktā

ki ab to ġhair hameñ aap kā samajhte haiñ

marīz-e-ishq hue jam.a is tamanna par

dar-e-huzūr ko dārushshifā samajhte haiñ

tire laboñ meñ hai ik rāz-e-zindagī pinhāñ

tirī nigāh ko tīr-e-qazā samajhte haiñ

huā ye hazrat-e-'sanjar' ko āj-kal saudā

kisī kī yaad ko yād-e-ḳhudā samajhte haiñ

tumhaare zulm ko bhi hum wafa samajhte hain

ada-o-naz ko apni qaza samajhte hain

junun-e-ishq mein hum kya se kya samajhte hain

tumhaari shan ko shan-e-KHuda samajhte hain

huzur aap hain husn-o-jamal ke bande

use na puchhiye hum aur kya samajhte hain

pari se hur se shams-o-qamar se behtar hain

hum un ke husn ko shan-e-KHuda samajhte hain

sitam-shiar samajhne lage hain hum tujh ko

wo aur hain jo tujhe ba-wafa samajhte hain

ye raaz-e-ishq chhupane se chhup nahin sakta

ki ab to ghair hamein aap ka samajhte hain

mariz-e-ishq hue jama is tamanna par

dar-e-huzur ko darushshifa samajhte hain

tere labon mein hai ek raaz-e-zindagi pinhan

teri nigah ko tir-e-qaza samajhte hain

hua ye hazrat-e-'sanjar' ko aaj-kal sauda

kisi ki yaad ko yaad-e-KHuda samajhte hain