tumhaari aarzu tum se kahin baDh kar hasin nikli

tumhārī aarzū tum se kahīñ baḌh kar hasīñ niklī

ki duniyā kī har ik shai se yahī dil ke qarīñ niklī

maiñ samjhā yaad bhī tark-e-ta.alluq par to aa.egī

magar jab dil TaTolā hai vahīñ ye jāguzīñ niklī

abhī kuchh aur bhī khelo mire chāhat bhare dil se

abhī bhī zaḳhm kam kam haiñ abhī hasrat nahīñ niklī

sar-e-mahfil kiyā rusvā mujhe terī mohabbat ne

jhukī jo naam par tere vo merī hī jabīñ niklī

nigāhoñ ne tujhe DhūñDā tujhe dil se pukārā hai

nazar aa.ī na jo sūrat vo sūrat dil-nashīñ niklī

hai do hī din kī umr-e-gul magar zinda-dilī dekho

tabassum lab pe raqsāñ hai fazā hargiz nahīñ niklī

jahāñ par sarhadeñ dair-o-haram kī ḳhatm hotī haiñ

vahīñ par nūr-e-īmāñ hai vahīñ rāh-e-yaqīñ niklī

hamārī zindagī dariyā kī mauj-e-muztarib sī hai

kahīñ ubhrī kahīñ machlī kahīñ Duubī kahīñ niklī

uThā kartī haiñ maujoñ kī tarah hī hasrateñ dil meñ

na.ī kitnī ubhar aa.eñ jo ik hasrat kahīñ niklī

shab-e-furqat 'habīb' apnā na koī kaam kā niklā

na aañsū bā-asar nikle na āh-e-ātishīñ niklī

tumhaari aarzu tum se kahin baDh kar hasin nikli

ki duniya ki har ek shai se yahi dil ke qarin nikli

main samjha yaad bhi tark-e-talluq par to aaegi

magar jab dil TaTola hai wahin ye jaguzin nikli

abhi kuchh aur bhi khelo mere chahat bhare dil se

abhi bhi zaKHm kam kam hain abhi hasrat nahin nikli

sar-e-mahfil kiya ruswa mujhe teri mohabbat ne

jhuki jo nam par tere wo meri hi jabin nikli

nigahon ne tujhe DhunDa tujhe dil se pukara hai

nazar aai na jo surat wo surat dil-nashin nikli

hai do hi din ki umr-e-gul magar zinda-dili dekho

tabassum lab pe raqsan hai faza hargiz nahin nikli

jahan par sarhaden dair-o-haram ki KHatm hoti hain

wahin par nur-e-iman hai wahin rah-e-yaqin nikli

hamari zindagi dariya ki mauj-e-muztarib si hai

kahin ubhri kahin machli kahin Dubi kahin nikli

uTha karti hain maujon ki tarah hi hasraten dil mein

nai kitni ubhar aaen jo ek hasrat kahin nikli

shab-e-furqat 'habib' apna na koi kaam ka nikla

na aansu ba-asar nikle na aah-e-atishin nikli