tumhaari basti mein karKHana laga hua hai

tumhārī bastī meñ kārḳhāna lagā huā hai

hamāre jaisoñ kā āb-o-dāna lagā huā hai

yahāñ koī chiiz bhī nahīñ ho rahī hai ta.amīr

ye sab abas toḌnā banānā lagā huā hai

mirī ravish to zamāne se thoḌī muḳhtalif hai

mire ta.āqub meñ kyoñ zamāna lagā huā hai

ik aise ghoḌe kī baag hāthoñ meñ dī ga.ī hai

jise muqaddar kā tāziyāna lagā huā hai

maiñ raat ke āḳhirī pahar se ye kah rahā huuñ

ki mez par dopahar kā khānā lagā huā hai

vo kyā ki sab tishna-kāmiyāñ juuñ kī tuuñ paḌī haiñ

ye kyā ki dariyā kā ābyāna lagā huā hai

udhar kisī aur hī zamāne kā tai huā thā

idhar koī aur hī zamāna lagā huā hai

hai rūh-parvar 'azīz' ye jāñkanī kā aalam

ki yaar logoñ kā aanā jaanā lagā huā hai

tumhaari basti mein karKHana laga hua hai

hamare jaison ka aab-o-dana laga hua hai

yahan koi chiz bhi nahin ho rahi hai tamir

ye sab abas toDna banana laga hua hai

meri rawish to zamane se thoDi muKHtalif hai

mere taaqub mein kyon zamana laga hua hai

ek aise ghoDe ki bag hathon mein di gai hai

jise muqaddar ka taziyana laga hua hai

main raat ke aaKHiri pahar se ye kah raha hun

ki mez par dopahar ka khana laga hua hai

wo kya ki sab tishna-kaamiyan jun ki tun paDi hain

ye kya ki dariya ka aabyana laga hua hai

udhar kisi aur hi zamane ka tai hua tha

idhar koi aur hi zamana laga hua hai

hai ruh-parwar 'aziz' ye jaankani ka aalam

ki yar logon ka aana jaana laga hua hai