tumhaari be-niyazi to hamari bebasi lazim

tumhārī be-niyāzī to hamārī bebasī lāzim

agar tum hī nahīñ sunte to apnī ḳhāmushī lāzim

zabān-e-hāl kyā bole sarishk-e-zaḳhm kyā Tapke

yahāñ ḳhāmoshiyoñ par bhī hai aksar ḳhāmushī lāzim

manāzil umr kī zāhir ma.āl-e-zindagī lāzim

junūñ kī sarḳhushī behtar surūr-e-mai-kashī lāzim

jamāl-e-zāt-e-vāhid kī ka.ī sāñchoñ meñ Dhal Dhal ke

butoñ tak baat pahuñchī hai to un kī bandagī lāzim

sukūn-o-āfiyat ke shahr haiñ gumnām vīrāne

magar un tak pahuñchne ke liye āvārgī lāzim

shu.ūr-e-zarf meñ aa kar sarāpā zarf huuñ 'rāhī'

nazar tishna hai lab tishna to dil kī tishnagī lāzim

tumhaari be-niyazi to hamari bebasi lazim

agar tum hi nahin sunte to apni KHamushi lazim

zaban-e-haal kya bole sarishk-e-zaKHm kya Tapke

yahan KHamoshiyon par bhi hai aksar KHamushi lazim

manazil umr ki zahir maal-e-zindagi lazim

junun ki sarKHushi behtar surur-e-mai-kashi lazim

jamal-e-zat-e-wahid ki kai sanchon mein Dhal Dhal ke

buton tak baat pahunchi hai to un ki bandagi lazim

sukun-o-afiyat ke shahr hain gumnam virane

magar un tak pahunchne ke liye aawargi lazim

shuur-e-zarf mein aa kar sarapa zarf hun 'rahi'

nazar tishna hai lab tishna to dil ki tishnagi lazim