tumhaari muntazir rahon ke manzar dekh sakte the

tumhārī muntazir rāhoñ ke manzar dekh sakte the

agar aate to in āñkhoñ ko patthar dekh sakte the

taraqqī ne diyā hai kuchh bahut kuchh ham se chhīnā hai

ki pahle har javāñ chhat par kabūtar dekh sakte the

vo aisī aarzū thā jo mukammal jism rakhtā thā

vo aisā ḳhvāb thā ki jis ko chhū kar dekh sakte the

sunā hai vo darīcha ab musalsal band rahtā hai

jahāñ ham ḳhvāhishoñ ko bār-āvar dekh sakte the

parinde kaise paḌhte haiñ qasīde shān-e-vahdat meñ

sahar ke vaqt aa jaate to manzar dekh sakte the

ilāhī kyā hue pand-o-nasīhat karne vaale log

ki jo mujh ko yahāñ mujh se bhī behtar dekh sakte the

chalo ghar se to baunoñ ke sivā miltā nahīñ koī

kahāñ haiñ vo jinheñ qad ke barābar dekh sakte the

tumhaari muntazir rahon ke manzar dekh sakte the

agar aate to in aankhon ko patthar dekh sakte the

taraqqi ne diya hai kuchh bahut kuchh hum se chhina hai

ki pahle har jawan chhat par kabutar dekh sakte the

wo aisi aarzu tha jo mukammal jism rakhta tha

wo aisa KHwab tha ki jis ko chhu kar dekh sakte the

suna hai wo daricha ab musalsal band rahta hai

jahan hum KHwahishon ko bar-awar dekh sakte the

parinde kaise paDhte hain qaside shan-e-wahdat mein

sahar ke waqt aa jate to manzar dekh sakte the

ilahi kya hue pand-o-nasihat karne wale log

ki jo mujh ko yahan mujh se bhi behtar dekh sakte the

chalo ghar se to baunon ke siwa milta nahin koi

kahan hain wo jinhen qad ke barabar dekh sakte the