tumhaari phunk se kya farq paDne wala hai

tumhārī phūñk se kyā farq paḌne vaalā hai

ye sham.a vo hai jise āñdhiyoñ ne paalā hai

ġham-e-hayāt ne us par bhī bojh Daalā hai

ki jis ne hosh bhī apnā nahīñ sañbhālā hai

uḌā rahā hai vahī merī muflisī kā mazāq

ki jis ne sikkoñ meñ īmān bech Daalā hai

hamāre sabr ko tum buzdilī kā naam na do

isī ḳhamoshī meñ poshīda ik javālā hai

tumheñ ġhurūr hai tāqat pe zar pe kasrat pe

hameñ ye naaz ki hamrāh haq-ta.ālā hai

alāva is ke koī aur rāsta hī nahīñ

bahut samajh ke hī sho.aloñ meñ haath Daalā hai

hazār sāzish-e-paiham ke bāvajūd 'ejāz'

jahāñ meñ haqq-o-sadāqat kā bol-bālā hai

tumhaari phunk se kya farq paDne wala hai

ye shama wo hai jise aandhiyon ne pala hai

gham-e-hayat ne us par bhi bojh Dala hai

ki jis ne hosh bhi apna nahin sanbhaala hai

uDa raha hai wahi meri muflisi ka mazaq

ki jis ne sikkon mein iman bech Dala hai

hamare sabr ko tum buzdili ka nam na do

isi KHamoshi mein poshida ek jawala hai

tumhein ghurur hai taqat pe zar pe kasrat pe

hamein ye naz ki hamrah haq-taala hai

alawa is ke koi aur rasta hi nahin

bahut samajh ke hi shoalon mein hath Dala hai

hazar sazish-e-paiham ke bawajud 'ejaz'

jahan mein haqq-o-sadaqat ka bol-baala hai