tumhaari yaad mere dil mein jab kabhi aai

tumhārī yaad mire dil meñ jab kabhī aa.ī

gumāñ huā ki añdhere meñ raushnī aa.ī

jahān-e-dil meñ usī din se inqalāb aaya

mizāj-e-husn meñ jis din se barhamī aa.ī

jo tum ga.e to mujhe zulmatoñ ne gher liyā

na āftāb hī niklā na chāñdnī aa.ī

na multafit hue terī nazar ke maare hue

sañvar sañvar ke ka.ī baar zindagī aa.ī

chaman meñ chaar taraf zulmatoñ ke Dere the

jalā hamārā nasheman to raushnī aa.ī

mire fasāna-e-ġham par mirī tabāhī par

vo ḳhush raheñ jinheñ be-sāḳhta hañsī aa.ī

ajab muamma hai 'mūsā' tazād-e-ālam-e-ishq

zamāna rone lagā aur mujhe hañsī aa.ī

tumhaari yaad mere dil mein jab kabhi aai

guman hua ki andhere mein raushni aai

jahan-e-dil mein usi din se inqalab aaya

mizaj-e-husn mein jis din se barhami aai

jo tum gae to mujhe zulmaton ne gher liya

na aaftab hi nikla na chandni aai

na multafit hue teri nazar ke mare hue

sanwar sanwar ke kai bar zindagi aai

chaman mein chaar taraf zulmaton ke Dere the

jala hamara nasheman to raushni aai

mere fasana-e-gham par meri tabahi par

wo KHush rahen jinhen be-saKHta hansi aai

ajab muamma hai 'musa' tazad-e-alam-e-ishq

zamana rone laga aur mujhe hansi aai