tumhaari yaad pali ja rahi hai

tumhārī yaad paalī jā rahī hai

mohabbat kal pe Taalī jā rahī hai

dikhā kar ḳhvāb ġham ke fā.edoñ kā

ḳhushī dil se nikālī jā rahī hai

ham is ko ishq kā ab naam deñge

ġhalat-fahmī jo paalī jā rahī hai

hameñ ab haar kā bhī dukh nahīñ hai

so terī jiit ḳhālī jā rahī hai

jahāñ se ḳhvāb paidā ho rahe the

vahīñ par ḳhaak Daalī jā rahī hai

badaltī hai vahī ik baat jag ko

jo phir se kal pe Taalī jā rahī hai

phir ik muskān se Dar lag rahā hai

phir ik ummīd paalī jā rahī hai

tumhaari yaad pali ja rahi hai

mohabbat kal pe Tali ja rahi hai

dikha kar KHwab gham ke faedon ka

KHushi dil se nikali ja rahi hai

hum is ko ishq ka ab nam denge

ghalat-fahmi jo pali ja rahi hai

hamein ab haar ka bhi dukh nahin hai

so teri jit KHali ja rahi hai

jahan se KHwab paida ho rahe the

wahin par KHak Dali ja rahi hai

badalti hai wahi ek baat jag ko

jo phir se kal pe Tali ja rahi hai

phir ek muskan se Dar lag raha hai

phir ek ummid pali ja rahi hai