tumhaari yaad to lipTi hai pure ghar ke manzar se

tumhārī yaad to lipTī hai puure ghar ke manzar se

darīche se zamīñ se baam se dīvār se dar se

mujhe to kūcha-e-mahbūb kā patthar bhī pyārā hai

nagīñ se la.al se almās se nīlam se gauhar se

muqaddar kī shab-e-zulmat kabhī raushan nahīñ hotī

diye se maah se qindīl se jugnū se aḳhtar se

tumhārī aañkh kī gahrā.iyoñ kā kyā taqābul ho

nadī se jhiil se dariyā se jharne se samundar se

yazīdoñ ko ḳhabar hai karbalā vaale nahīñ Darte

sināñ se tiir se talvār se barchhī se ḳhanjar se

kareñ ham sa.ī jitnī bhī kahāñ mumkin hai bach paanā

za.īfī se qazā se qabr se barzaḳh se mahshar se

tumhārī diid kī tishna-nigāhoñ ko hai kyā nisbat

subū se tuur se chilman se paimāne se kausar se

ġhazal kī shā.irī kā vasf hai sab se judāgāna

adā se fikr se uslūb se jiddat se tevar se

tumhaari yaad to lipTi hai pure ghar ke manzar se

dariche se zamin se baam se diwar se dar se

mujhe to kucha-e-mahbub ka patthar bhi pyara hai

nagin se lal se almas se nilam se gauhar se

muqaddar ki shab-e-zulmat kabhi raushan nahin hoti

diye se mah se qindil se jugnu se aKHtar se

tumhaari aankh ki gahraiyon ka kya taqabul ho

nadi se jhil se dariya se jharne se samundar se

yazidon ko KHabar hai karbala wale nahin Darte

sinan se tir se talwar se barchhi se KHanjar se

karen hum sai jitni bhi kahan mumkin hai bach pana

zaifi se qaza se qabr se barzaKH se mahshar se

tumhaari did ki tishna-nigahon ko hai kya nisbat

subu se tur se chilman se paimane se kausar se

ghazal ki shairi ka wasf hai sab se judagana

ada se fikr se uslub se jiddat se tewar se