tumhein itna batana chahte hain

tumheñ itnā batānā chāhte haiñ

qasam se muskurānā chāhte haiñ

kaTegī dar-ba-dar ye 'umr kab tak

kahīñ to ab Thikānā chāhte haiñ

shajar mahfūz āñgan kā rakho tum

parinde chahchahānā chāhte haiñ

'adāvat 'umr bhar karte rahe jo

ta'alluq ab nibhānā chāhte haiñ

añdhere kī numā.ish ḳhuub kar ke

charāġhoñ ko jalānā chāhte haiñ

nigāhoñ kī pahuñch se duur ab tak

tumhārī zad meñ aanā chāhte haiñ

guzārā vāh-vāhī se na hogā

zarā daulat kamānā chāhte haiñ

'aqīdat se jhukāyā jā sake sar

'abhay' vo āstāna chāhte haiñ

tumhein itna batana chahte hain

qasam se muskurana chahte hain

kaTegi dar-ba-dar ye 'umr kab tak

kahin to ab Thikana chahte hain

shajar mahfuz aangan ka rakho tum

parinde chahchahana chahte hain

'adawat 'umr bhar karte rahe jo

ta'alluq ab nibhana chahte hain

andhere ki numaish KHub kar ke

charaghon ko jalana chahte hain

nigahon ki pahunch se dur ab tak

tumhaari zad mein aana chahte hain

guzara wah-wahi se na hoga

zara daulat kamana chahte hain

'aqidat se jhukaya ja sake sar

'abhay' wo aastana chahte hain