tumhein mahki hui dilkash fazaen yaad karti hain

tumheñ mahkī huī dilkash fazā.eñ yaad kartī haiñ

sahar kī ye tarab-afzā havā.eñ yaad kartī haiñ

ye aa.heñ yaad kartī haiñ ye aañsū yaad karte haiñ

tumheñ thā naaz jin par vo vafā.eñ yaad kartī haiñ

nashāt-e-zindagī baḳhshī tumhārī jin jafāoñ ne

tumheñ ek ek kar ke vo jafā.eñ yaad kartī haiñ

hasīñ lamhāt guzre the kabhī jin ke kināroñ par

unhīñ chashmoñ kī ye shīrīñ sadā.eñ yaad kartī haiñ

urūs-e-husn-e-fitrat kī adā.eñ tum ko pyārī thiiñ

vahī pyārī vahī rangīñ adā.eñ yaad kartī haiñ

tumhīñ se kaif-o-naġhma thā navāsanjān-e-gulshan meñ

navāsanjān-e-gulshan kī navā.eñ yaad kartī haiñ

nigāheñ ban ke jo tum par kabhī qurbān hotī thiiñ

tumheñ 'asmā' ke dil kī vo du'ā.eñ yaad kartī haiñ

tumhein mahki hui dilkash fazaen yaad karti hain

sahar ki ye tarab-afza hawaen yaad karti hain

ye aahen yaad karti hain ye aansu yaad karte hain

tumhein tha naz jin par wo wafaen yaad karti hain

nashat-e-zindagi baKHshi tumhaari jin jafaon ne

tumhein ek ek kar ke wo jafaen yaad karti hain

hasin lamhat guzre the kabhi jin ke kinaron par

unhin chashmon ki ye shirin sadaen yaad karti hain

urus-e-husn-e-fitrat ki adaen tum ko pyari thin

wahi pyari wahi rangin adaen yaad karti hain

tumhin se kaif-o-naghma tha nawasanjaan-e-gulshan mein

nawasanjaan-e-gulshan ki nawaen yaad karti hain

nigahen ban ke jo tum par kabhi qurban hoti thin

tumhein 'asma' ke dil ki wo du'aen yaad karti hain