tumhein ye chand sitare talash karte hain

tumheñ ye chāñd sitāre talāsh karte haiñ

hasīn shab ke nazāre talāsh karte haiñ

tumhāre naġhma-e-dilkash kī guuñj hai ab tak

tumheñ nadī ke kināre talāsh karte haiñ

bichhaḌ ga.e ho jo ai rah-ravān-e-rāh-e-hayāt

tumheñ rafīq tumhāre talāsh karte haiñ

tumheñ nigāh bahar-sū talāsh kartī hai

tasavvurāt hamāre talāsh karte haiñ

tumhāre baa'd jo tanhā haiñ be-kas-o-ġhamgīñ

vo phir tumhāre sahāre talāsh karte haiñ

tumhīñ ko DhūñDne meñ saarī zindagī guzrī

tumhīñ ko ham thake haare talāsh karte haiñ

hasīn yaad ke gul aah ke sharāre haiñ

tumheñ ye gul ye sharāre talāsh karte haiñ

vo lamhe ‘ishrat-e-rafta ke aaj ham 'asmā'

kabhī jo hañs ke guzāre talāsh karte haiñ

tumhein ye chand sitare talash karte hain

hasin shab ke nazare talash karte hain

tumhaare naghma-e-dilkash ki gunj hai ab tak

tumhein nadi ke kinare talash karte hain

bichhaD gae ho jo ai rah-rawan-e-rah-e-hayat

tumhein rafiq tumhaare talash karte hain

tumhein nigah bahar-su talash karti hai

tasawwuraat hamare talash karte hain

tumhaare ba'd jo tanha hain be-kas-o-ghamgin

wo phir tumhaare sahaare talash karte hain

tumhin ko DhunDne mein sari zindagi guzri

tumhin ko hum thake haare talash karte hain

hasin yaad ke gul aah ke sharare hain

tumhein ye gul ye sharare talash karte hain

wo lamhe ‘ishrat-e-rafta ke aaj hum 'asma'

kabhi jo hans ke guzare talash karte hain