tu aasman main hun zamin man-digram-tu-digri

tū āsmāñ maiñ huuñ zamīñ man-dīgram-tū-dīgrī

terā mirā rishta nahīñ man-dīgram-tū-dīgrī

tū zinda-o-pā.inda hai maiñ ḳhaak kā huuñ mustahiq

tū lā-makāñ kā hai makīñ man-dīgram-tū-dīgrī

ai merī shāḳh-e-yāsmīñ tujh ko nahīñ mujh par yaqīñ

mujh ko hai bas tujh par yaqīñ man-dīgram-tū-dīgrī

dikhtī hai mujh ko har taraf allāh kī kārīgarī

avval namūna haiñ hamīñ man-dīgram-tū-dīgrī

tū sāmne kuchh aur hai kuchh aur hai tū ba.ad-azāñ

kahnā mujhe hai āḳhirīñ man-dīgram-tū-dīgrī

ham ho ga.e mahlūl ab ik dūsre meñ jān-e-jāñ

tā-kas na goyad ba.ad-azīñ man-dīgram-tū-dīgrī

haiñ raas mujh ko talḳhiyāñ tujh ko haiñ bhātī narmiyāñ

maiñ aur tū yaksāñ nahīñ man-dīgram-tū-dīgrī

tu aasman main hun zamin man-digram-tu-digri

tera mera rishta nahin man-digram-tu-digri

tu zinda-o-painda hai main KHak ka hun mustahiq

tu la-makan ka hai makin man-digram-tu-digri

ai meri shaKH-e-yasmin tujh ko nahin mujh par yaqin

mujh ko hai bas tujh par yaqin man-digram-tu-digri

dikhti hai mujh ko har taraf allah ki karigari

awwal namuna hain hamin man-digram-tu-digri

tu samne kuchh aur hai kuchh aur hai tu baad-azan

kahna mujhe hai aaKHirin man-digram-tu-digri

hum ho gae mahlul ab ek dusre mein jaan-e-jaan

ta-kas na goyad baad-azin man-digram-tu-digri

hain ras mujh ko talKHiyan tujh ko hain bhati narmiyan

main aur tu yaksan nahin man-digram-tu-digri