tu abhi tak bhi mujhe KHud se juda jaanta hai

tū abhī tak bhī mujhe ḳhud se judā jāntā hai

maiñ kabhī soch nahīñ saktā ḳhudā jāntā hai

mujh se bai'at kā taqāzā na tavaqqo' rakhnā

merā sar neze pe sajne ko jazā jāntā hai

dost hai vo to samajh jā.egā hājat terī

dost chehre se tire man kī sadā jāntā hai

jāntā hai ki mujhe 'ishq hai sahrāoñ se

vo mohabbat meñ pahāḌoñ kī anā jāntā hai

is se baḌh kar bhī bhalā aur vafā kyā hogī

mujh se baḌh kar vo har ik rasm-e-vafā jāntā hai

kis qadar daan kiyā us ne mujhe āb-e-hayāt

ye to maiñ jāntā yā merā ḳhudā jāntā hai

zulf khole to qayāmat vahīñ barpā kar de

āñkhoñ āñkhoñ meñ vo tūfān uThā jāntā hai

sub.h kī pahlī azānoñ se bhī pahle uTh kar

roz ik raaz vo fitrat se nayā jāntā hai

ruḳh-e-daurāñ pe paḌe parde haTā do yaaro

jaan jā.eñge jo kahte haiñ ki kyā jāntā hai

vo jo har vaqt kahe jaatā hai maiñ jāntā huuñ

vo nahīñ jāntā sūraj ko diyā jāntā hai

husn-e-pur-nūr suḳhan-sāz vo āzād-manash

us kā bartāv magar sharm-o-hayā jāntā hai

maiñ nahīñ jāntā kuchh bhī maiñ yahī jāntā huuñ

aur kyā jānñā ye jaan ke kyā jāntā hai

vo numū-ḳhez bahāroñ meñ palā surḳh gulāb

vo mirī aañkh kī surḳhī ko harā jāntā hai

mere mālik mirā dāman nahīñ rakhnā ḳhālī

mirā beTā mujhe har taur bharā jāntā hai

tu abhi tak bhi mujhe KHud se juda jaanta hai

main kabhi soch nahin sakta KHuda jaanta hai

mujh se bai'at ka taqaza na tawaqqo' rakhna

mera sar neze pe sajne ko jaza jaanta hai

dost hai wo to samajh jaega hajat teri

dost chehre se tere man ki sada jaanta hai

jaanta hai ki mujhe 'ishq hai sahraon se

wo mohabbat mein pahaDon ki ana jaanta hai

is se baDh kar bhi bhala aur wafa kya hogi

mujh se baDh kar wo har ek rasm-e-wafa jaanta hai

kis qadar dan kiya us ne mujhe aab-e-hayat

ye to main jaanta ya mera KHuda jaanta hai

zulf khole to qayamat wahin barpa kar de

aankhon aankhon mein wo tufan uTha jaanta hai

subh ki pahli azanon se bhi pahle uTh kar

roz ek raaz wo fitrat se naya jaanta hai

ruKH-e-dauran pe paDe parde haTa do yaro

jaan jaenge jo kahte hain ki kya jaanta hai

wo jo har waqt kahe jata hai main jaanta hun

wo nahin jaanta suraj ko diya jaanta hai

husn-e-pur-nur suKHan-saz wo aazad-manash

us ka bartaw magar sharm-o-haya jaanta hai

main nahin jaanta kuchh bhi main yahi jaanta hun

aur kya jaanna ye jaan ke kya jaanta hai

wo numu-KHez bahaaron mein pala surKH gulab

wo meri aankh ki surKHi ko hara jaanta hai

mere malik mera daman nahin rakhna KHali

mera beTa mujhe har taur bhara jaanta hai