tu ang ang mein KHushbu si ban gaya hoga

tū añg añg meñ ḳhushbū sī ban gayā hogā

maiñ sochtā huuñ ki tujh se gurez kyā hogā

tamām raat mire dil se aañch aatī rahī

kahīñ qarīb koī shahr jal rahā hogā

tū mere saath bhī rah kar mire qarīb na thā

ab is se aur fuzūñ fāsla bhī kyā hogā

mujhe ḳhud apnī vafā par bhī e'timād nahīñ

kabhī to tū bhī mirī tarah sochtā hogā

kabhī to sañg-e-malāmat kahīñ se aa.egā

koī to shahr meñ apnā bhī āshnā hogā

zarā sī baat pe kyā dostoñ ke muñh aa.eñ

ġharīb dil thā muravvat meñ jal-bujhā hogā

tu ang ang mein KHushbu si ban gaya hoga

main sochta hun ki tujh se gurez kya hoga

tamam raat mere dil se aanch aati rahi

kahin qarib koi shahr jal raha hoga

tu mere sath bhi rah kar mere qarib na tha

ab is se aur fuzun fasla bhi kya hoga

mujhe KHud apni wafa par bhi e'timad nahin

kabhi to tu bhi meri tarah sochta hoga

kabhi to sang-e-malamat kahin se aaega

koi to shahr mein apna bhi aashna hoga

zara si baat pe kya doston ke munh aaen

gharib dil tha murawwat mein jal-bujha hoga