tu dekh use sab ja aankhon ke uTha parde

tū dekh use sab jā āñkhoñ ke uThā parde

mānind suvaidā ke dil biich use ghar de

aalam ke muraqqe meñ tasvīr usī kī hai

sab husn yahāñ yaaro us husn ke haiñ garde

sayyād kā sharminda huuñ be-par-o-bālī se

uḌ kar abhī jā pahuñchūñ jo mujh ko ḳhudā par de

saaqī tujhe kam-zarfī mastoñ se nahīñ lāzim

tarsā na mujhe kāfir sāġhar ke ta.iiñ bhar de

bazm-e-dil-e-mushtāqāñ juuñ shām-e-ġharībāñ hai

yak jalva meñ tū raushan aa sham-e-sifat kar de

ham arz kiyā us kī ḳhidmat meñ ki ai sāhab

itne tire bandoñ meñ ek ham bhī haiñ nau-varde

daulat se tirī sab kuchh ham paas muhayyā hai

lab ḳhushk o jigar biryāñ chashm-e-tar o dil sar de

'hātim' vo lagā kahne ġhusse se ki chal jhūThe

bandā maiñ use jānūñ jo pahle qadam sar de

hushyār karūñ 'hātim' mastoñ ko nigāhoñ meñ

qatra mai-e-vahdat se jo sāqī-e-kausar de

tu dekh use sab ja aankhon ke uTha parde

manind suwaida ke dil bich use ghar de

aalam ke muraqqe mein taswir usi ki hai

sab husn yahan yaro us husn ke hain garde

sayyaad ka sharminda hun be-par-o-baali se

uD kar abhi ja pahunchun jo mujh ko KHuda par de

saqi tujhe kam-zarfi maston se nahin lazim

tarsa na mujhe kafir saghar ke tain bhar de

bazm-e-dil-e-mushtaqan jun sham-e-ghariban hai

yak jalwa mein tu raushan aa sham-e-sifat kar de

hum arz kiya us ki KHidmat mein ki ai sahab

itne tere bandon mein ek hum bhi hain nau-warde

daulat se teri sab kuchh hum pas muhayya hai

lab KHushk o jigar biryan chashm-e-tar o dil sar de

'hatim' wo laga kahne ghusse se ki chal jhuThe

banda main use jaanun jo pahle qadam sar de

hushyar karun 'hatim' maston ko nigahon mein

qatra mai-e-wahdat se jo saqi-e-kausar de