tu ek wahm hai is ke siwa nahin kuchh bhi

tū ek vahm hai is ke sivā nahīñ kuchh bhī

so mere dil ke liye aasrā nahīñ kuchh bhī

ye dhuup Dhaltī huī umr kī muñDeroñ se

ye jism bujhte hue aur sila nahīñ kuchh bhī

vo niiñd aur kisī naam se huī mansūb

magar vo ḳhvāb ki tere sivā nahīñ kuchh bhī

maiñ zard phuul huuñ maiñ ik charāġh lau ke baġhair

mere liye koī bārish havā nahīñ kuchh bhī

tū mere vāste sab kuchh hai ya.anī sab kuchh hai

tire liye maiñ nahīñ kuchh to jā nahīñ kuchh bhī

to kyā maiñ tujh ko kabhī yaad bhī nahīñ aatā

to kyā tū mere liye sochtā nahīñ kuchh bhī

ye kaisā moḌ hai ye kaisī rā.egānī hai

koī duā koī harf-e-duā nahīñ kuchh bhī

ye log aap ḳhudā ban ga.e haiñ in ke liye

hujūm-e-ḳhalq-e-ḳhudā kyā ḳhudā nahīñ kuchh bhī

tu ek wahm hai is ke siwa nahin kuchh bhi

so mere dil ke liye aasra nahin kuchh bhi

ye dhup Dhalti hui umr ki munDeron se

ye jism bujhte hue aur sila nahin kuchh bhi

wo nind aur kisi nam se hui mansub

magar wo KHwab ki tere siwa nahin kuchh bhi

main zard phul hun main ek charagh lau ke baghair

mere liye koi barish hawa nahin kuchh bhi

tu mere waste sab kuchh hai yani sab kuchh hai

tere liye main nahin kuchh to ja nahin kuchh bhi

to kya main tujh ko kabhi yaad bhi nahin aata

to kya tu mere liye sochta nahin kuchh bhi

ye kaisa moD hai ye kaisi raegani hai

koi dua koi harf-e-dua nahin kuchh bhi

ye log aap KHuda ban gae hain in ke liye

hujum-e-KHalq-e-KHuda kya KHuda nahin kuchh bhi