tu farishton mein hai ruswa main gunahgaron ke bich

tū farishtoñ meñ hai rusvā maiñ gunahgāroñ ke biich

donoñ hī bahte haiñ lekin muḳhtalif dhāroñ ke biich

koī sūraj bhī nahīñ chamkā sakā ab tak jise

maiñ huuñ ik aisā hī manzar chand sayyāroñ ke biich

sabza-zār-e-zindagī meñ DhūñDhtā hai kyoñ mujhe

maiñ bhaTaktā phir rahā huuñ zard kohsāroñ ke biich

kitnī bedardī se mujh ko rauñdtī hai ek bhiiḌ

jaise koī shahr ho be-rahm tātāroñ ke biich

duur tak gahre añdhere ke sivā kuchh bhī nahīñ

vaqt aa kar ruk gayā hai aaj kin ġhāroñ ke biich

dekhte ho maiñ libās-e-sang meñ malbūs huuñ

kyoñ liye chalte ho mujh ko barq-raftāroñ ke biich

kaun thā mere sivā jaltī huī poshāk meñ

ek paikar sā nazar aatā thā angāroñ ke biich

roz bah jaatā huuñ maiñ alfāz ke sailāb meñ

aur phir hotā huuñ zāhir chand aḳhbāroñ ke biich

ye ḳhalā meñ uḌne vaale ye bulandī ke marīz

āsmāñ bhī ghir gayā hai kaise bīmāroñ ke biich

dhajjī dhajjī ho rahā thā māhtāb-e-nīm-shab

TukḌe TukḌe ho rahī thī raat kohsāroñ ke biich

tu farishton mein hai ruswa main gunahgaron ke bich

donon hi bahte hain lekin muKHtalif dhaaron ke bich

koi suraj bhi nahin chamka saka ab tak jise

main hun ek aisa hi manzar chand sayyaron ke bich

sabza-zar-e-zindagi mein DhunDhta hai kyon mujhe

main bhaTakta phir raha hun zard kohsaron ke bich

kitni bedardi se mujh ko raundti hai ek bhiD

jaise koi shahr ho be-rahm tataron ke bich

dur tak gahre andhere ke siwa kuchh bhi nahin

waqt aa kar ruk gaya hai aaj kin ghaaron ke bich

dekhte ho main libas-e-sang mein malbus hun

kyon liye chalte ho mujh ko barq-raftaron ke bich

kaun tha mere siwa jalti hui poshak mein

ek paikar sa nazar aata tha angaron ke bich

roz bah jata hun main alfaz ke sailab mein

aur phir hota hun zahir chand aKHbaron ke bich

ye KHala mein uDne wale ye bulandi ke mariz

aasman bhi ghir gaya hai kaise bimaron ke bich

dhajji dhajji ho raha tha mahtab-e-nim-shab

TukDe TukDe ho rahi thi raat kohsaron ke bich