tu masiha hai teri ek ada kafi hai

tū masīhā hai tirī ek adā kaafī hai

jāñ-ba-lab ko tire dāman kī havā kaafī hai

jab bhī yaad aa.uuñ tasavvur meñ tasavvur karnā

mujh se milne ke liye itnā pata kaafī hai

merī nazroñ kī ḳhatā kam hai tire sar kī qasam

mere dilbar tire jalvoñ kī ḳhatā kaafī hai

terī furqat ne javānī kā maza chhīn liyā

chāhne vaale ko bas itnī sazā kaafī hai

kaam aate nahīñ tā-umr ye miTTī ke charāġh

aap kī yaad kā bas ek diyā kaafī hai

saarī duniyā kī duā.eñ maiñ kahāñ rakkhūñgā

merī baḳhshish ke liye maañ kī duā kaafī hai

phuul kī tarah khile haiñ tire zaḳhmoñ ke gulāb

aur kyā chāhiye 'dilkash' ye davā kaafī hai

tu masiha hai teri ek ada kafi hai

jaan-ba-lab ko tere daman ki hawa kafi hai

jab bhi yaad aaun tasawwur mein tasawwur karna

mujh se milne ke liye itna pata kafi hai

meri nazron ki KHata kam hai tere sar ki qasam

mere dilbar tere jalwon ki KHata kafi hai

teri furqat ne jawani ka maza chhin liya

chahne wale ko bas itni saza kafi hai

kaam aate nahin ta-umr ye miTTi ke charagh

aap ki yaad ka bas ek diya kafi hai

sari duniya ki duaen main kahan rakkhunga

meri baKHshish ke liye man ki dua kafi hai

phul ki tarah khile hain tere zaKHmon ke gulab

aur kya chahiye 'dilkash' ye dawa kafi hai