tu mila tha aur mere haal par roya bhi tha

tū milā thā aur mere haal par royā bhī thā

mere siine meñ kabhī ik iztirāb aisā bhī thā

jis tarah dil āshnā thā shahr ke ādāb se

kuchh usī andāz se shā.ista-e-sahrā bhī thā

zindagī tanhā na thī ai ishq terī raah meñ

dhuup thī sahrā thā aur ik mehrbāñ saayā bhī thā

ishq ke sahrā-nashīnoñ se mulāqāteñ bhī thiiñ

husn ke shahr-e-nigārāñ meñ bahut charchā bhī thā

hijr ke shab-zinda-dāroñ se shanāsā.ī bhī thī

vasl kī lazzat meñ gum logoñ se ik naatā bhī thā

har fasurda aañkh se mānūs thī apnī nazar

dukh bhare sīnoñ se ham-rishta mirā siina bhī thā

thak bhī jaate the agar sahrā-navardī se to kyā

muttasil sahrā ke ik vajd-āfrīñ dariyā bhī thā

tu mila tha aur mere haal par roya bhi tha

mere sine mein kabhi ek iztirab aisa bhi tha

jis tarah dil aashna tha shahr ke aadab se

kuchh usi andaz se shaista-e-sahra bhi tha

zindagi tanha na thi ai ishq teri rah mein

dhup thi sahra tha aur ek mehrban saya bhi tha

ishq ke sahra-nashinon se mulaqaten bhi thin

husn ke shahr-e-nigaran mein bahut charcha bhi tha

hijr ke shab-zinda-daron se shanasai bhi thi

wasl ki lazzat mein gum logon se ek nata bhi tha

har fasurda aankh se manus thi apni nazar

dukh bhare sinon se ham-rishta mera sina bhi tha

thak bhi jate the agar sahra-nawardi se to kya

muttasil sahra ke ek wajd-afrin dariya bhi tha