tu na aaya teri yaadon ki hawa to aai

tū na aayā tirī yādoñ kī havā to aa.ī

dil ke tapte hue sahrā pe ghaTā to aa.ī

maiñ to samjhā thā ki ab koī na apnā hogā

tere kūche se magar ho ke sabā to aa.ī

mere marne kī sahī jaañ se guzarne kī sahī

mere haq meñ tere hoñToñ pe duā to aa.ī

dil-dahī kā jo salīqa nahīñ aayā na sahī

aap ko dil ke dukhāne kī adā to aa.ī

ho gayā āp-hī-āp aaj mudāvā apnā

gar masīhā nahīñ aayā to qazā to aa.ī

mujh ko shikva nahīñ ab qāsim-e-qismat se 'shakeb'

kuchh na aayā mire hisse meñ vafā to aa.ī

tu na aaya teri yaadon ki hawa to aai

dil ke tapte hue sahra pe ghaTa to aai

main to samjha tha ki ab koi na apna hoga

tere kuche se magar ho ke saba to aai

mere marne ki sahi jaan se guzarne ki sahi

mere haq mein tere honTon pe dua to aai

dil-dahi ka jo saliqa nahin aaya na sahi

aap ko dil ke dukhane ki ada to aai

ho gaya aap-hi-ap aaj mudawa apna

gar masiha nahin aaya to qaza to aai

mujh ko shikwa nahin ab qasim-e-qismat se 'shakeb'

kuchh na aaya mere hisse mein wafa to aai