tu ne kaisa ye sitam ai sitam-ijad kiya

tū ne kaisā ye sitam ai sitam-ījād kiyā

bāġhbāñ ban ke gulistāñ hī ko barbād kiyā

vāqi.a ye hai abhī sirf qafas badlā hai

ham ye samjhe the ki sayyād ne āzād kiyā

sarfaroshī mirī jur.at ne atā kī mujh ko

daur-e-hāzir ne agar aap ko jallād kiyā

laa.e duniyā mire zabt-e-ġham-e-daurāñ kī misāl

jaan de dī na magar shikva-e-bedād kiyā

yaad meñ jis kī zamāne ko bhulāyā ham ne

bhuul kar bhī na kabhī us ne hameñ yaad kiyā

tere har vaar ko sahne ke liye ham ne bhī

sang siine ko kiyā qalb ko faulād kiyā

tu ne kaisa ye sitam ai sitam-ijad kiya

baghban ban ke gulistan hi ko barbaad kiya

waqia ye hai abhi sirf qafas badla hai

hum ye samjhe the ki sayyaad ne aazad kiya

sarfaroshi meri jurat ne ata ki mujh ko

daur-e-hazir ne agar aap ko jallad kiya

lae duniya mere zabt-e-gham-e-dauran ki misal

jaan de di na magar shikwa-e-bedad kiya

yaad mein jis ki zamane ko bhulaya hum ne

bhul kar bhi na kabhi us ne hamein yaad kiya

tere har war ko sahne ke liye hum ne bhi

sang sine ko kiya qalb ko faulad kiya