tu ne koshish zara bhi ki hi nahin

tū ne koshish zarā bhī kī hī nahīñ

varna ye naav Dūbtī hī nahīñ

is mohabbat meñ TūTnā dil kā

farz hotā hai lāzmī hī nahīñ

'ishq kā ye dayār hai sāhib

hai ḳhudā bhī yahāñ ḳhudī hī nahīñ

kaan kab se lagā.e baiThī huuñ

koī bhī aañkh boltī hī nahīñ

chaak pe rakkhī rah ga.ī miTTī

koī taḳhlīq to huī hī nahīñ

maut panje gaḌā.e hai apne

zindagī mujh ko chhīntī hī nahīñ

har musavvir kā us pe da.avā hai

ek tasvīr jo banī hī nahīñ

vaqt us ne diyā hai milne kā

aur mire paas meñ ghaḌī hī nahīñ

koī 'saritā' hai is qadar mujh meñ

us se haT kar ġhazal huī hī nahīñ

tu ne koshish zara bhi ki hi nahin

warna ye naw Dubti hi nahin

is mohabbat mein TuTna dil ka

farz hota hai lazmi hi nahin

'ishq ka ye dayar hai sahib

hai KHuda bhi yahan KHudi hi nahin

kan kab se lagae baiThi hun

koi bhi aankh bolti hi nahin

chaak pe rakkhi rah gai miTTi

koi taKHliq to hui hi nahin

maut panje gaDae hai apne

zindagi mujh ko chhinti hi nahin

har musawwir ka us pe dawa hai

ek taswir jo bani hi nahin

waqt us ne diya hai milne ka

aur mere pas mein ghaDi hi nahin

koi 'sarita' hai is qadar mujh mein

us se haT kar ghazal hui hi nahin