tu parastish ko jo nikle to yun dam-bhar nikle

tū parastish ko jo nikle to yuuñ dam-bhar nikle

but-kade se bhī kisī roz payambar nikle

rāh-rau saath nibhāne kā bharam de mujh ko

ḳhuub mumkin hai bharam saath se behtar nikle

nam kiye zulf-e-shikan vo jo sar-e-bām aa.e

jaise sūraj kahīñ dariyā se vuzū kar nikle

dard ko pāltā huuñ aañkh ke pathrāne tak

aur rokūñ to pahāḌoñ se samundar nikle

sham.a-e-ḳhāmosh pe aa kar ke havā jyuuñ guzrī

Thiik kuchh ham pe tirī yaad ke lashkar nikle

baad mere tujhe rone ko vahī shaḳhs mile

jis kā shāna mire shāne ke barābar nikle

tu parastish ko jo nikle to yun dam-bhar nikle

but-kade se bhi kisi roz payambar nikle

rah-rau sath nibhane ka bharam de mujh ko

KHub mumkin hai bharam sath se behtar nikle

nam kiye zulf-e-shikan wo jo sar-e-baam aae

jaise suraj kahin dariya se wuzu kar nikle

dard ko palta hun aankh ke pathrane tak

aur rokun to pahaDon se samundar nikle

shama-e-KHamosh pe aa kar ke hawa jyun guzri

Thik kuchh hum pe teri yaad ke lashkar nikle

baad mere tujhe rone ko wahi shaKHs mile

jis ka shana mere shane ke barabar nikle