tu sahib-e-jamal bhi hai ba-basar bhi hai

tū sāhib-e-jamāl bhī hai bā-basar bhī hai

ye terā infirād hai tū kūza-gar bhī hai

aa to ga.e haiñ dasht-e-mohabbat meñ qāfile

lekin koī farīq-e-junūñ mo'atabar bhī hai

pahuñchegī merī naav bhalā kis tarah ki aaj

tūfān bhī hai raah meñ haa.il bhañvar bhī hai

mumkin hai merā zikr samā.at pe baar ho

qissa mirā tavīl bhī hai muḳhtasar bhī hai

sab ke liye hai ishq kā rasta judā-judā

āsān bhī hai aur kahīñ pur-ḳhatar bhī hai

vo dil kī dhaḌkanoñ meñ bhī raqsāñ hai har ghaḌī

ma.ashūq-e-be-misāl hai nūr-e-nazar bhī hai

yūñhī guzārī jā.egī kyā zindagī 'razā'

yā ḳhvāhishoñ kī qaid se koī mafar bhī hai

tu sahib-e-jamal bhi hai ba-basar bhi hai

ye tera infirad hai tu kuza-gar bhi hai

aa to gae hain dasht-e-mohabbat mein qafile

lekin koi fariq-e-junun mo'atabar bhi hai

pahunchegi meri naw bhala kis tarah ki aaj

tufan bhi hai rah mein hail bhanwar bhi hai

mumkin hai mera zikr samaat pe bar ho

qissa mera tawil bhi hai muKHtasar bhi hai

sab ke liye hai ishq ka rasta juda-juda

aasan bhi hai aur kahin pur-KHatar bhi hai

wo dil ki dhaDkanon mein bhi raqsan hai har ghaDi

mashuq-e-be-misal hai nur-e-nazar bhi hai

yunhi guzari jaegi kya zindagi 'raza'

ya KHwahishon ki qaid se koi mafar bhi hai