tu zamane ki jaan hai ki nahin

tū zamāne kī jaan hai ki nahīñ

tujh pe martā jahān hai ki nahīñ

dil bhī deñ jaan bhī nisār kareñ

ye kaḌā imtihān hai ki nahīñ

zāhid un ke niyāz-mandoñ meñ

be-niyāzī kī shaan hai ki nahīñ

gāliyāñ aap kī sunūñ kab tak

mere muñh meñ zabān hai ki nahīñ

aglā va.ada vo aglā qaul-o-qarār

yaad kuchh mehrbān hai ki nahīñ

kaun de jaan in hasīnoñ par

jaan hai to jahān hai ki nahīñ

dil churāyā hai tum ne 'muztar' kā

sach hamārā gumān hai ki nahīñ

tu zamane ki jaan hai ki nahin

tujh pe marta jahan hai ki nahin

dil bhi den jaan bhi nisar karen

ye kaDa imtihan hai ki nahin

zahid un ke niyaz-mandon mein

be-niyazi ki shan hai ki nahin

galiyan aap ki sunun kab tak

mere munh mein zaban hai ki nahin

agla wada wo agla qaul-o-qarar

yaad kuchh mehrban hai ki nahin

kaun de jaan in hasinon par

jaan hai to jahan hai ki nahin

dil churaya hai tum ne 'muztar' ka

sach hamara guman hai ki nahin