tufan-e-bala se jo main bach kar guzar aaya

tūfān-e-balā se jo maiñ bach kar guzar aayā

vo pūchh ke sahrā se pata mere ghar aayā

āġhāz-e-tamannā ho ki anjām-e-tamannā

ilzām bahar-hāl hamāre hī sar aayā

is meñ to koī dil kī ḳhatā ho nahīñ saktī

jab aañkh lagī aap kā chehra nazar aayā

bastī meñ mirī kaj-kulahī jurm huī hai

dekhūñgā agar ab koī patthar idhar aayā

aayā tirī mahfil meñ jo bhūle se mirā naam

āñkhoñ meñ zamāne kī vahīñ ḳhuun utar aayā

aisā bhī kahīñ tark-e-ta.alluq meñ huā hai

naama koī aayā na koī nāma-bar aayā

fan hai vo samundar ki kināra nahīñ jis kā

Duubā huuñ 'muzaffar' to mirā naam ubhar aayā

tufan-e-bala se jo main bach kar guzar aaya

wo puchh ke sahra se pata mere ghar aaya

aaghaz-e-tamanna ho ki anjam-e-tamanna

ilzam bahar-haal hamare hi sar aaya

is mein to koi dil ki KHata ho nahin sakti

jab aankh lagi aap ka chehra nazar aaya

basti mein meri kaj-kulahi jurm hui hai

dekhunga agar ab koi patthar idhar aaya

aaya teri mahfil mein jo bhule se mera nam

aankhon mein zamane ki wahin KHun utar aaya

aisa bhi kahin tark-e-talluq mein hua hai

nama koi aaya na koi nama-bar aaya

fan hai wo samundar ki kinara nahin jis ka

Duba hun 'muzaffar' to mera nam ubhar aaya